Psychological Thriller genre hi Mizo movie-a kan hmuh meuh loh a ni a, tunah chuan Thim Aw en tur kan nei dawn ta. A changtupa rilru buai/ramhuai tihbuai nun lantirin, he movie-ah hian psychological warfare hmuh theih a ni a, movie hi chhawng 3 anga then a ni.
Naupang pakhat chu a tet laia class a kal laia, “aw’ a hriatin ti tura a hrilh anga a ṭhiante thil ruk aṭanga ṭanin, nupui fanau a neih tawh hnuah chu “aw” chuan rawn tibuai lehin, a mitthlaah a tet laia “aw” a hriat thin nen khan inanga a hriat (flashback memory) avangin a buai chhunzawm ta zel a ni. “Aw” chuan a thunun tial tial a, a nunah harsatna a thlen chho a, a ṭhiante leh chhungte pawhin an hlau tawh a ni. Pathian mite pawh a hlau tawh lo a, ramhuai pai mizia a nei chho ta hial a ni.
Thim Aw movie hi a tak behchhana thleng, rilru lam buaina emaw ramhuaiin a tihbuai anga ngaih theih a ni a, a vawrtawpah erawh Pathian tihdamna changa a that chhuah leh dan chungchang a ni.
